ថ្ងៃសៅរ៍ ៣រោច ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី ០៨ ខែមេសា ឆ្នាំ ២០២៣ ឯកឧត្តមកិត្តិនីតិកោសលបណ្ឌិត ស៊ឹម កា អនុប្រធានទី១ ព្រឹទ្ធសភា និងលោកជំទាវ ព្រមទាំងមន្រ្តីខុទ្ទកាល័យឯកឧត្តមអនុប្រធានទី១ ព្រឹទ្ធសភា បានអញ្ជើញនាំយកទេយ្យវត្ថុ គ្រឿងឧបភោគ បរិភោគ និងបច្ច័យមួយចំនួនទៅវេរប្រគេនព្រះសង្ឃ សម្រាប់ពិធីបុណ្យចូលឆ្នាំថ្មីប្រពៃជាតិខ្មែរ នៅវត្តទេពនិម្មិត ហៅវត្តអញ្ចាញ នៅឃុំក្របៅ ស្រុកកំចាយមារ និងវត្តពង្ររង្សី ហៅវត្តជ្រៃម្រាក់ នៅឃុំគោកគង់កើត ស្រុកកញ្ចៀច ខេត្តព្រៃវែង និងបានប្រារព្ធពិធីសូត្រមន្តបង្សុកូលដើម្បីឧទ្ទិសកុសលជូនដល់បុព្វការីជន បន្ទាប់មកឯកឧត្តមកិត្តិនីតិកោសលបណ្ឌិត និងលោកជំទាវ បានអញ្ជើញចុះពិនិត្យ ស្ថានភាពនៃការកសាងសងអគារសិក្សាថ្មី និងនាំយកសំភារៈសិក្សាមួយចំនួន រួមមាន កាបូប សៀវភៅ ប៊ិច និងខ្មៅដៃ ដើម្បីជូនលោកគ្រូអ្នកគ្រូ សម្រាប់ចែកដល់សិស្សានុសិស្ស ដែលកំពុងសិក្សាផងដែរ៕